صارت الموضة هل الايام انو كل واحد تقريبا صار يطالب بتدخل اجنبي عسكري باشكالوا المختلفة , بس في سؤال كتير مهم ما لئيت حدا حكى عنو او عزب حالو بالتدوير على الاجابة او احيانا فكر بطرحو على حالو
السؤال هو مين هو الاجنبي يلي مستعد يتدخل عسكريا ويبعت شبابو ليموتو بحرب السوريين ضد بشار؟
شو ملامحو, شو اسمو, ولا هو بس مجرد هلوسات متل العصابات المريخية عند النظام؟
يمكن الواحد يجاوب تركيا؟
طيب طرحت على حالك سؤال ليش تركيا ممكن تروح للحرب ومصاعبها ويغامر رئيس الوزراء بشعبيتو و يبعت شباب تركيا للخطر و اضافة لاحتمال حدوث مواجهة مع ايران في حال الهجوم على الاسد
في جواب منطقي هو انو تركيا بتشوف انو ازا في حدا لح يطيح ببشار بعمل عسكري فلازم الاتراك يكنلون ايد بهل الشي من شان يضمنو نفوذ بالمستقبل بسوريا من شان ما تتكرر تجربة العراق وهاد الشي صح
بس الاتراك لحالون ما بدون يروحوا للحرب
ممكن دول الخليج ؟
سؤال ليش شوفيلها مصلحة؟
مبين ضرب محور الممانعة و دفش ايران لحدودها و كسر الهلال الشيعي, هون بجي سؤال انو هنن بملكوا الاوة لحالون ليعملوا هيك عملة؟ الجواب طبعا لأ
طيب مع تركيا, الجواب لساعتو لأ لانو بشار معو ايران
الامريكان والفرنسيين
مصلحتون متل مصلحة دول الخليج ومن ناحية المبدأ هنن بحسنو يكسروا راسو لبشار مع ايران ويدفشوا الاتراك ودول الخليج للحرب معون كمان
بس
مين أل انو الحرب لح تحقق مصالحون؟
طيب شو احتمال انو يكون يلي بعد بشار اخطر عليهون من بشار و ايران ؟
في ضوء صعود السلفيين في ليبيا و نجاحاتون غير المتوقعة بمصر, الغربيين بلشو يستفسروا عن شو هية اوتون بسوريا بعد الاسد؟
الغربيين بنظروا للسلفيين انون مرحلة قبل قاعدية و مسألة تحولون لتنظيمات تشبه القاعدة هي مسألة وقت ما اكتر و هنن من شان يقضوا على تنظيم القاعدة ومشتقاتو تحالفوا مع الشيطان “ايران” مرة من المرات, فلا تتوقع منون انو ياخدوا اي خطوة فيها احتمال انو تؤدي لسيطرت السلفيين على سوريا