المُندسّة السورية: غفوة عشر دقائق

قبل شوي غفيت عيني و شفت حالي بغرفتي بالبيت بالجسر الأبيض
كنت قاعد عالتخت عم اسمع اغاني و فاتح شباك الغرفة . كان يوم من هالأيام و بعتقد كان الجمعة كان الجسر الأبيض و كل محلات نزلة الطياني مسكرين و مافي حدا بالشوارع. كنت عم اقرأ اخبار المظاهرات و الشهداء و فجأة بسمع كلمة تكبير و بيرد عليها بالآلاف الله اكبر !!
متل اللي كان غريق و مسك قطعة خشب
لبست اللي شفتو قدامي و نزلت بلا جاكيت و لابس البوط بلا جرابات و انا عم اركض بدي الحق مصدر الصوت . و انا نازل عالدرج اسمع الله أكبر حرية .. الله اكبر حرية
طلعت من باب البناية و الصوت جاية من اول طلعة المهاجرين و كان الصوت عم يقرب ركضت و طلعت من اخر الحارة و اتطلعت على احلى منظر بشوفو بحياتي
شفت حوالي 5 الاف او اكتر عم يتظاهرو بس شفت شي غريب بهالمنظر
شفت هالة خضرا حواليهون
متل الملائكة محاوطة المظاهرة استغربت انو لهلق ما اجا شبيحة او سيارات مخفر شرطة عرنوس
ضليت عم قرب عليهون و انا عم اهتف بس بلا صوت
كان مطفي صوتي اصرخ من كل قلبي و ما يطلع صوت و انا ابكي بدي شارك معون
قربت بس ما اققدر فوت معاهون الهالة الخضرا كانت عم تصدني كل ما قرب
انهارت اعصابي و انا عم ابكي و دموعي عبت عيوني ما عاد شفت من ورا دموعي و ما عاد قدرت احمل حالي رحت وقفت على جنب جنب محل العسل و قعدت ابكي و هنن مكملين لتحت على ساحة عرنوس
صرت قول لحالي معقول الله عم يحاسبني اني سكتت كل الفترة الماضية و ما حكيت كلمة الحق
وقفت على طولي و قمت غسلت وشي بحنفية مي سبيل محطوطة عالزاوية و صرت اركض و قول بقلبي لو ما طلعلي صوت بدي روح و ارفع ايدي بالهوا معون روحي مو ارخص من روح الباقي
كنت عم اركض بطريقة هستيرية خايف تنفض المظاهرة قبل ما اوصل
وصلت و هنن كانو عم يكسرو صنم حافظ بحديقة عرنوس طلعت معون و انا عم اضرب الصنم بهستيريا و وقع الصنم و الكل سكت
اتطلعت حوالي و ركزت بالوجوه
شفت غياث مطر عم يبتسم بسمتو المعتادة و شفت حمزة الخطيب و ابراهيم شيبان و 6047 من شهداء ثورتنا

HM AL