المُندسّة السورية: رسائل سريعة للمجلس والهيئة

يا مجلس يا وطني، ويا هيئة يا تنسيق أنتِ، غير إني حاسسكون متل قلتكون حابب قلكون إنو كبرو شوي بحياة الله شوي صغيرة كبرو وحاجتكون يعني بشرفي عيب
لك استحوا على كبرتكون شوي. بس شوي. العمى ما عاد تعرفو تتفقو ولما بتتفقو بيطلعلي حدا بيعارض الاتفاق وبيوقعو على عريضة وإنو مدري شو ومدري شو لك خلاص ولو في دم عالأرض لك استحوا من الشهدا.
*********************

على فكرة أنا بيعجبني جداً برهان غليون بس اللي خلقو لبرهان خلق غيرو
حبيباتي بالمجلس الوطني وبهيئة التنسيق مع احترامي الأكبر للمجلس الوطني ليكو عمو انا مو سياسي ولا بفهم بالسياسة بقرش بس اللي عم تعملو اسمو أكل مدري شو (لاحظوا إني محترم) يعني تعو لقلكون تنيناتكون انضمو تحت جناحي (أنا مجازاً) وبعلمكون كيف تتبنوا مطالب الشارع الثائر
يعني ليك أنت وياه من غير الثوار أنتو ولا شي بس الثوار من غيركون كل شي فزوقو على دمكون بقا
**********************

عزيزي المجلس: عم تعاني من مشكلة عدم الرغبة؟ عزيزتي الهيئة: عم تعاني من عدم اهتمامو فيكي؟ ما الكن غير: التيار التالت
التيار التالت حل عصري وسريع لكل المشاكل الزوجية
التيار التالت تاريخ مضمون وخبرة واسعة في اللعب عالحبلين
والآن حصريا، مع كل تيار تالت هدية نــــــــظـــــــــــــــــــــــــــام ســــــــــــــــــــــوري عزيزي المجلس، عزيزتي الهيئة، خلافاتكم الزوجية تهمنا… (ولكن يرجى حلها في البيت لان الشارع مليء بالاطفال… اللي عم يموتو…) راحتكم تعنينا وشكراً لاستخدامكم منتجاتنا
مع تحيات: أعصاب الشعب السوري
(منقول من شي حدا)
**********************

هدول بوستات من صفحتي عالفيس بووك وعسى ان تصل الرسالة

دلير يوسف
رئيس تحرير مجلة بدنا حل الإلكترونية
www.bedna7al.com