المُندسّة السورية: “العمليه نجحت بس المريض مات”

بعد ما قريت تعليقات البعض بمقال اللادينيين و الملحدين فتت علحمام و راجعت من قرفي…. نعم,بعرف في كتير منهون شبيحه من النوع اللئيم المتخفي بس للاسف في كتير من هالتعليقات بيمثلو الاقصائيين القمعيين المجرمين الظلاميين الارهابيين يللي ما بيختلفو عن بشار السافل ابن السافل الا بالواجهة اما من جوا فهم متلو تماما…..

من اول يوم من الثورة و نحنا عم نحذر من هالشي… من اول يوم و نحنا عم نقول انتبهو من طيور الظلام لانو هدول اسوأ من عصابة الاسد بمليون مرة بس ما حدا راد يسمع…. و الكل يقولولي: لا لا لا لا لا… نحنا طلعنا عم نطالب بحريه و بعدالة و بدولة ديمقراطيه مدنيه…. لا لا لا لا ,لا تحكي هيك لانو هادا الحكي بس بيفيد النظام …. سوريا لكل السوريين مو مهم دينك و لا طائفتك… مو مهم شو ما كانت طريقة تفكيرك….

تفضلو يا ساده… كل يوم التطرف عم بيزيد و اكل الهوا عم بيزيد…. من اول يوم حذرنا من هالشي و ما استفدنا شي… لما كنت انتقد العرعور و قناة وصال يجن جنون البعض و يقولولي لا لا لا لا….الزلمه بس حكى على فرامات المولينكس (تعقيب المحرر* : يتوفر في الأسواق أصناف أخرى من الفرمات  *راجع سياسة الموقع بخصوص المواد الاعلانيه)  و قطع الالسنه و ما شابه.,ما قال غير هيك…. للاسف… بعقل كتير مننا ما في غير فرامات مولينيكس (تعقيب المحرر* : يتوفر في الأسواق أصناف أخرى من الفرمات  *راجع سياسة الموقع بخصوص المواد الاعلانيه)…. و لسه كل شيخ متطرف مقزز بيطلع على قناة وصال الحقيره الظلاميه المجرمه يللي ما بتقل اجراما عن الكلب بشار و بيحكي حكي اقصائي بيخللي الواحد يكفر بالعبراني….

امبارح شفت فيديو بقناة الوصال المجرمه عن واحد *** لحيتو عشر امتار عم بيهاجم عضوه من المجلس الوطني و عم بيقول كيف المسلمين بيقعدو مع كافره بنفس المجلس و من هالحكي…. قسما بالله لو انو قدامي لدعوستو بالصرامي لهلجبان ال*ذر….. الثورة عم تزيح عن اهدافها بطريقه مقلقه و عم تصير ذات لون واحد اقصائي و متطرف تحكمه لحى قذره وصوليه انتهازيه اقصائيه و اذ هلق ما عملنا مراجعه لهلشي فسوريا رايحه للخراب الاكيد و التقسيم…. يعني متل ما قال الجراح “العمليه نجحت بس المريض مات”…..

بيجوز نخلص من بشار بس ما رح نحقق ابدا اهداف الثوره ببناء دولة مدنيه ديمقراطيه يسودها العدل و المساواة و التقدم و التطور… و عالارجح ما يظل من سوريا شي…. تصير خمس ست دول تتصارع فيما بينها…. و كل مالو التطرف عم بيزيد… بدكون تكسبو الصامتين و المترددين و الخايفين و الرماديين? اي من طي*ي رح تكسبوهن هيك …. بتعرفو عدد الناس يللي لحد فتره قريبه كانت مع الثوره و هلق ما عاد فارقه معون لا ثوره و لا سوريا و صار بس بدون يهربو من المستقبل المظلم يللي عم ينتظرون? ما بتعرفو….. عم تقلبو ثورة حريه و عداله و ديمقراطيه لثوره دينيه خالصه و بلون واحد متطرف اقصائي قمعي لا يختلف عن عصابة الاسد بشيء…. هنيئا لكم بدولتكم الجديده يللي حدودها ما رح تكون ابدا حدود الدوله السوريه الحاليه…. و هادا كلو بدون ما يتدخلو خفافيش الظلام الخليجيه و فكرهون الوهابي الاجرامي بمالهون القذر….. بكره بس يتدخلو يا حبيبي علينا شو رح يصير فينا…. لك فوتو لحظه على صفحة الثوره السوريه بالفيسببوك… لك صارت بؤرة للتطرف و الطائفيه البشعه… مع ادراكي انو في كتير معلقين هم عبارة عن شبيحه مقنعين بس الاغلبيه هم مندسين اعمى قلبهم التطرف… للاسف.

كل هالحكي عم قولو لنصلح الاخطاء هلق و ليراجع كل واحد مننا حالو و يفكر شوي …. بس للاسف انا عندي قناعه انو كل هادا الحكي ما رح يفيد و البلد رايحه للخراب و التقسيم…. لو ش ما صار رح ظل واقف ضد السفاح بشار بس يللي جايي رح يكون متلو اذ مو اخرى…. يعني استبدال قمع مافيوي اجرامي بقمع ديني لا يقل اجرام عنو اذ مو اكتر منو….

و هنيئا لكم دولة المستقبل الطالبانيه اذ بدكون تظلو تفكرو هيك…

لا لا… مو النظام يللي عم يدفعنا للتطرف…. لك نحنا متطرفين و اقصائيين خلئه… و الايام اثبتت هالشي…

و بالآخر اعذروني اذا بعض كلماتي كانت قويه بس يللي بيعرفني بيعرف اني لا اخشى في الله لومة لائم و لو ماني خايف عالثوره و عالبلد ما كنت حتى عذبت حالي بالتعليق.

و الله من وراء القصد.

ما اوسخنا من حكام

ما اوسخنا من جمهور

ما اوسخنا ما اوسخنا ما اوسخنا

سيكون خرابا سيكون خرابا

هذي الامة لا بد لها ان تأخذ درسا في التخريب.

“مظفر النواب”

———————————-

كتبه : واحد مئهور بيجوزبس مو اكيد,احتمال,يمكن تعرفو