: الطائفة الثوركجية

- من وين جايبها هي ثوركجية؟
- حبيبي هي طائفة من الشعب، “بس ماتتهمني بالطائفية دغري بترجاك” قصدي قسم من الشعب السوري عم يحاولوا يفكروا شوي قاموا شافوا حالهون واقعين بين سفاءين
الثورجية والمنحبكجية… يمكن، مافيني أكدلك شي!!!

- ليك
- شو؟
- هلأ مو بشار الأسد هو المسؤول ، يعني ، عن كل شي عم يصير من مجازر وقتل ووو ؟
- إيه !!
- ومو صفحة الثورة السورية ، يعني ، هي اللي عم تحرك تقريباً تقريباً الناس وأسماء الجمع والجيش الحر ووو ؟
- ايييه !!؟؟؟
- طيب هلأ ليش ما بيتحدوا مع بعض ؟
- مين مع مين؟ قصدك الأسد وفداء ؟ لك ما هنن ضد بعض ياغبي
- لك بعرف ضد بعض، بس الهون هدف واحد، انو يدبحو هالشعب …بس كل واحد بيدبح نص… يمكن، مافيني أكدلك شي!!!

- في شغلة ماعم افهمها، انو ليش بعد١٥ آذار صارو يقولوا الشعب السوري عظيم ؟
- لك مانك شايفو كيف عم يثور بوجه هالنظام الدموي وكيف عم ينقتل ؟
- بس مو كل الشعب عم يثور، يعني القصد انّو هاللي عم يثور هو الشعب العظيم والباقي جحش؟ بجوز مابعرف،، طيب وقبل ١٥ آذار ماكان عظيم يعني؟!!! يمكن، مافيني أكدلك شي!!!

- عندي سؤال بريء !
- شو ؟
- ياترى قناة الدنيا مانا بحاجة لمواهب جديدة لتطور حالها وبرامجها يعني؟ أو عالأقل تكمل بنفس الألق تبعا؟
- ما بعرف، بس ليش هالسؤال البلا طعمة؟
- لأن عم شوف مواهب تانية عالضفة التانية … يمكن، مافيني اكدلك شي!!!

لن ادخل في ثنائياتكم القاتلة :
مؤامرة او لا مؤامرة : فهناك احتمالات اخرى.
شبيح مجرم او ثائر قديس : هناك احتمالات اخرى.
جيش حر او جيش قاتل : هناك احتمالات اخرى
معارضة وطنية او معارضة خائنة : هناك احتمالات اخرى
متدينٌ متطرف او ملحدٌ عربيد : هناك احتمالات اخرى

لهذا سأعلن لكم :
لحظة سقوط الطاغية ستبدأ الثورة لإسقاط طاغية آخر ولن تتاح الفرصة لأحدٍ منّا أن يجرؤ على البوح باسمه الحقيقي ..

مو…اطن