المُندسّة السورية: هيئة/مجلس وشوارب إسقاط النظام‎

بعد أن طفر العالم والشعب  من المعارضة السورية
وبعد أن طلب مراراً وتكراراً العرب والغرب منهم الأنضواء تحت
سقف واحد على الأقل كي يتم الأعتراف بهم بدلاً من النظام
وبعد أن تجاوزهم الشعب بأشواط وأتجه ليشق طريقه مع الجيش الحر والأحرار
وبعد أن بلغ النظام مراحل متقدمة من الأجرام والقتل والمجازر وتجاوز حدوده
بعد كل ذلك كان هذا اللقاء بين المعارضة بمجلسها وهيئتها موظابطة

……….

المجلس: يازلمي العالم صرع مخنا وهو يلح ويصر ويطلب أن نتفق
الهيئة: معك حق نفس الشي العرب وروسيا والصين وايران يطلبوا منا الحوار
المجلس : دم شعبنا صار للركب يارجل ونحن لسه ماأتفقنا على أبسط مبادىء
الهيئة: المفروض نوجد حل يامجلس بسرعة لأن أهلنا بلشوا يفقدوا ثقتهم فينا
المجلس : طيب أنضووا تحت جناحنا نحن المعارضة الخارجية والعالم كله معنا ونحن إلنا التمثيل الأكبر أسأل الجزيرة والعربية والبي بي سي وغيرها
الهيئة: بالعكس نحن اللي ألنا التمثيل الأكبر على الأرض أسأل المحللين شحادة والدنيا والعالم والمنار والنظام وغيره
المجلس: يازلمي شو عم تحكي خلينا نحسبها ونقيسها
الهيئة : يالله طالع هالألة الحاسبة والمسطرة وشوف مين فينا أكبر تمثيل  وأوسع أنتشار
المجلس : مشكلتكم أنكم بدكم النظام يضل،  يعني تشلحّوه طقم كحلي وتلبسوه أبيض
الهيئة: وأنتم بدكم تشيلوا كل النظام وتحطوا واحد تاني وهالشي لايناسبنا ولانتجاسر نحكيه
لأنكم عايشين برا بس نحن تحت رحمة الأمن بيدكونا بالسجن أو إعدام على طول
المجلس : طيب نحن شوذنبنا؟؟
الهيئة: ونحن شو ذنبنا كمان؟؟
المجلس: ياأخي طلعوا برات سوريا وأحكوا مثلنا وبهيك نتفق
الهيئة: ولادي بالمدرسة بيروح عليهم عام دراسي، وعامل جمعية الشهر الجاي دوري  خاف تروح علي
المجلس: معقولة العالم عم تموت والبلد راح يروح وأنت داير على موسم دراسة أو جمعية؟؟
الهيئة: أنت بتعطيك قطر وتركيا مو فارقة معاك المصاري مو مثلنا نحن فقراء
المجلس: ياأخي بس تطلعوا بتصير الناس تساعدكم لاتخاف وتنزلوا بأحلى فنادق مثلنا
الهيئة : أحلف أنو مابتاخذوا كل المناصب لو طلعنا تهريب
المجلس: يازلمي أنت علماني وشيوعي  مابتأمن بالحلفان بعدين شو ضمانتك أنت؟؟
الهيئة: راح أمسك شواربي
المجلس: ماعندك شوارب
الهيئة : وأنت نفس الشي ماعندك شوارب ومابدي الوعد غير منك أنت بالذات
………………..
المجلس والهيئة يتفقان على مهلة مثل مهل الجامعة العربية 15 يوم ريثما تنبت شواربهم
كي يمسكوها كعهد وميثاق على أن تخرج الهيئة من سوريا للأتفاق كمرحلة أولى
……….
المجلس : شو طالع فتوجنيك بالشارب ياهيئة
الهيئة : شكراً شكراً..وأنت كمان يامجلس كتير متغير شكلك وحليان

خلينا  خلينا ناخد صورة تذكارية

لا لا بعيد بعيد من هون يامجلس …الجدار اللي ورانا متهدم  من القصف مابدنا يطلع بالصورة هيك شي

خلينا ندور على حيط تاني….خلص هالمكان حلو ومناسب

المجلس : لا لا ياهيئة شوف الدم اللي معبي الدنيا من الشعب  أبعد شوي لهنيك منشان الصورة تكون أحلى

تم إلتقاط الصورة والأبتسامة ملء الوجه

المجلس  : صحيح سمعت شوصاير؟؟
الهيئة: شو خير ..شو صاير ؟؟
المجلس: (المندسة )ماغيرها منزّلة موضوع عن لحية رياض الأسد والناس قايمة قاعدة على لحيته
شفت حضارة أتباعي وأتباعك؟؟
الهيئة: هذه مشكلة كبير خاف بكرا  يقولوا ؟؟؟ أو يظنوا…… أو يفكروا….؟؟
المجلس : مظبوط.. مظبوط..معك حق.. وأنا هذا اللي خايف منو
………
المجلس والهيئة يتفقان على مهلة مثل مهل الجامعة أسبوع  ريثما يحلقوا شواربهم
خوفاً من أن تفسر عند المندسين بشي طريقة تؤخر إسقاط النظام فهذه الأشياء جداً مهمة في الثورة وأمام عذابات ودماء السوريين
…………….
المجلس: ياسلام الواحد حاسس حالو رجع طبيعي ثوري حر بدون قيود
الهيئة: معك حق كنت حاسس حالي فيه شي غريب معهم حق جماعة المندسة
……………..
لولولولولولولولو …..زغاريد …..وطلقات فرح من بواريد
الله أكبر
الحمدلله ولك الحمد
يارب
يامحمد
ياعلي
ياعدرا
ياحسين
ياشيخنا الحلاج
يافلان
ياعلان
لولولولولولولولولو …كرنفال فرح ……هتاف ……زغاريد .. تكبيير
صفقات ودبكات والناس رايحة جاية ..عرس .. فرح بل أكبر أكبر من ذلك
الناس تقبّل بعضها .. تصافح .. تحمل بعضها دون سابق معرفة
العصافير تغني.. الأزهار تتمايل بزهو… الشمس تضحك.. الهواء يحمل التواشيح ويحلق بها
………………
المجلس : شو فيه شو صاير؟؟
الهيئة: مابعرف  خلينا نسأل
الهيئة والمجلس يتقدمان من أحد الشباب وهو يرقص ويحمل علم الأستقلال والنصر
شو فيه أخي شو صاير؟؟
نظر الشاب المندس إليهما وعيناه تسكب دمعاً: مبروك لقد سقط النظام
لقد أنتصرت الثورة
لقد داس السوريين على الأستبداد على الظلم على الجور والحيف
مبروك علينا ياسوريين
ثم تقدم منهم صبي صغير  مرتدي علم المجد وسألهم : عمو عمو أنتو غرباء؟؟
الهيئة موسوريين؟؟؟
ليش ماعم تشاركونا بالفرح حتى لو ضيوف معلش عمو شاركونا والله نحن كتير فرحانين
الهيئة مو سوريين؟؟ بل سوريين بس المجلس التأسسي لسوريتنا مازال
بين شوارب إسقاط النظام
وخلافات المآرب
وعاشت سوريا حرةأبية
ولعنة اللة على من يقدم أنانيته على حساب أمنا وعرضنا وترابنا وكرامتنا السورية

————————–

حر ولكن