المُندسّة السورية: دخيلك الحقني المخابرات أخدوني‎

عاقل :أحكيلي عن قصة مرتك والجزيرة والعربية
مجنون: والله ياعاقل شي بيبكي ويضحك ويحزن
بس خود ياسيدي على القصة بكل تفاصيلها

……………

الساعة الحادية عشرة ليلاً وأنا نايم بفندق بحلب
فجأة يهز مسمعي صوت التلفون كالبوق الجعفري في المحافل الدولية
قمت وعيوني تكاد تخرج من محجريها حين رأيت رقم زوجتي
خير أن شاء الله…. اللهم أجعله خير… لسه من يومين جاية من فرع المخابرات
ياولد وكّل ربك أكيد بدها  تسأل عن شي أو تطلب زعتر حلبي أو صابون غار
مجنون : ألو
هي : دخيلك الحقني المخابرات أخدوني

بسرعة تصّرف وأمن مصاري المخابرات قدام الباب بدهم ياخدوني معهم
مجنون : أهدأي شوي وخبريني شو التهمة؟؟
هي: مابعرف مابعرف
مجنون : طيب ساعة وبكون عندك لاتخافي ولاتحكي شي وأسألي عن ابو سامر فوراً

………………

وصلت عالفرع مثل المجنون بعد أن أتصلت بأبوسامر وأبو بطحة  بالطريق
مساءالخير شباب وين الغرفة15؟؟
العسكري : بوجهك الغرفة اللي بتلاقي بابها علية صورة المعلّم
دقيت عالباب وفتت بعد أن رد علي صوت الممانعين من الداخل
مجنون : مساء الخير
الضابط : أهلا أهلا بخيي مجنون .. تفضل تفضل قعود
كانت الصوبيا وحرارتها توحي بأن الثورة وصلت على فرع المخابرات من الداخل
مجنون : خير شوفيه؟؟ وين زوجتي؟؟ وشو التهمة؟؟
الضابط: لاتقلق ..مرتك بخير وصارت بالبيت بس صادرنا نقالها ووقعّت على تعهد
مجنون: يعني عنا ولاد صغار  كان على الأقل نطرتوا للصبح
الضابط: أنت بتعرف الأوامر
مجنون: طيب شو التهمة؟؟
الضابط الثاني: يامجنون مرتك كانت عم تشوف الجزيرة والعربية
مجنون:  عم تحكوا جد ياجماعة؟؟أو بدكم تمهدولي  و توحولي بشي؟؟
الضابط :مثل ماسمعت ، وأنت بتعرف أن الجزيرة والعربية وهالمحطات المأجورة المتأمرة العميلة
تحبط العزم وتهدد الأمن القومي  وتشهّر  وتزور وتفبرك الحقائق وعم تفسد شريحة كبيرة من الشعب

وبالدليل من شهر كانت نسبة مشاهدة الدنيا والأخبارية 20٪ اليوم وصلت 10٪ و و
مجنون: طيب ومرتي  شو دخلها بهيك قصص؟؟
الضابط الثاني: ولوووووو يامجنون أنت سائق سرفيس وبتحتك بالناس يومياً وتعرف الجواب
مرتك ياسيدي عم تشارك بدعم الدول الأجنبية
مرتك عم تدعم التأمر على البلد
مرتك بصوت التلفزيون عم تساهم ببث الأخبار الكاذبة عندما يسمعها الجيران
مرتك عم تضلل الطفولة عندك بالبيت وتهتك عذرية الصبايا المارين بالشارع

حين يسمعوا مسبات وشتائم الفوار  والمعارضين( للمعلم) والحكومة
مرتك عم تهدد السلم الأهلي
مرتك عم تساهم بنشر الطائفية حين يصدر من صوت التلفزيون هتافات يالله مالنا غيرك
والله وأكبر وماشاكل من العبارات التي يشعر معها جيرانك أنهم كفار أو خارجين عن الملة
مجنون: طيب معلش معلش ياسيادة الضابط ممكن سؤال؟؟
الضابط : تفضل
مجنون: يعني  كل القنوات الإباحية والوسخة مفتوحة مابتسبب  اللي حكيتوا عنو
بس العربية والجزيرة عنا بالبيت بتعمل كل هالشي؟؟؟
الضابط الثاني: يامجنون أنت بتعرف هديك محطات وقنوات وأمور جنسية بسيطة
بس العربية والجزيرة طروحاتها قومية وأستعمارية وووووووووو
مجنون: آسف معكم حق ، بس شو التعهد اللي وقعت عليه مرتي؟؟
الضابط: أنو ماتشوف الجزيرة والعربية ألا أوقات البرامج الثقافية فقط
وحتى لما بدها تطلع إشارة القناة توطي الصوت أو تستخدم السبيكر كي لايسمع الجيران
مجنون: طيب والتلفون ليش صادرتوه؟؟
الضابط: كي نكسب شوفتك وتاخذه معك  وخاصة بعد أن توصى فيكم أبو سامر وأبو بطحة
مجنون: مشكورين ، ويمد يده ويخرج مبلغ ويحطه على الطاولة أمام الضابط
والله هذا اللي معي ، هذا دخلي وشغلي منذ آخر مرة كنت عندكم
وأصلاً كنت شايلهم لأعمل فحص نظر وأشتري نضارة جديدة
بتعرفوا السواقة بدها نظر كويس ونص وقتي عالسرفيس بين حلب والشام طلبات خارجية
الضابط: يامجنون مو كأنهم قلال؟؟
مجنون: ١٧ألف  مانن قلال صدقوني، يعني  مشوار بهالبرد والثلج والتعتير بيسوى 100ألف
وأنا ماسك قلبي بيدي  عالطريق وبعيد عن أولادي والله أعلم برجع أو لا بظل هالظروف
فمشوا حالكم فيهم وأنا بوعدكم بشوية حلويات المشوار الجاية وبعدين نحن جيران وأهل
والتلفون لو عاجبكم خدوه هدية بس خفوا شوية
الضابط: التلفون موديل قديم مابيناسب، البنت عندي قال بدها أيفون

…………..

عاقل: يمسح دموعه قهراً وغضباً وحزناً
مجنون: شبك ؟؟ليش عم تبكي؟؟
عاقل: على حالنا اللي وصلنا له، أبكي على تعبك وشقاك وأنت عم تدفعه كي تشتري عرضك وتحافظ على بيتك وتصون نفسك
أنقهر على أهلنا اللي يعرفوا كل شي وينكروا، نأمنهم  ويسرقوا ، نوثق فيهم ويغدروا
نحبهم ويكرهوا ، نقترب منهم ويبعدوا ، نرميهم بالزهور فيرمونا بالقبور

ناس تنشحط من بيتها أمام أولادها وجيرانها

ناس تتساوم على أعراضها

ناس يفتكروها الناس شبيحة وإلا هي ياحرام عم تدفع كل مواردها كي تعيش بلا جرجرة

ناس جيرانها وأهلها عم يبتزوها بلا أحترام ولاأخلاق

وناس عم تموت ببلاش وناس عم بتموت بثمن ونحن على هم يبكي وهم يضحك

حسبنا الله ونعم الوكيل

————————————-

حر ولكن