المُندسّة السورية: سر البق بق!

نكتة من هالنكت القديمة و الطويلة…بتبلش بأنو واحد بيلاقي قنينة فيها ورقة مكتوب عليها انو اذا اردت انو تعرف سر البقبق روح للمكان الفلاني…بيروح للمكان الفلاني بيلاقي اشارة بتقلو طير لهنيك و هنيك بيقلولو اذا اردت ان تعرف سر البقبق ساوي كذا…و هيك النكتة بتطول على حسب  مراق الراوي و مخيلتو ممكن تطول و تقصر..و بيفوتك من باب و بياخدك من شباك..و انو بالاخير مدري وين و خود طيارة و ركاب سفينة و طلاع  و نزيل و زت القنينة بالبحر……بزت القنينة بالبحر….بتقوم بتغرق و هي عم تغرق بتطلع صوت بق بق بق…..هاد السر و خلصت النكتة…يعني بالاخير هي نكتة غلاظة اكتر من انها نكتة فكاهة…..

هلأ من يومين…طل علينا بشار و حكالنا قصة سر البقبق الجديدة…تقريبا يعني… بفوتك من شباك و بطلعك من بلوعة…و بالاخير ما عرفنا شو هو البقبق تبع القصة…

و من وقتها العالم  كلها ملتهية  بالبق بق بق…و بينسو النكتة بحد ذاتها…. انو ليك شو بق و قال انو هو ما دخلو….ليك شو بق و قال عن الامم المتحدة…ليك شو بقت الاي بي سي و حرفت و اقتطعت… صرلنا يومين الدنيا معباية بقبقات ليوم البقبقات..انو بقبق راسي بصراحة…ركزنا عالبقبقة و نسينا انها نكتة…و نكتة غليظة….ركزنا عالبقبقة و ما ركزنا عالكذب و التناقض….ركزنا على المؤامرة..و ما ركزنا على استشحاشنا…

بيجيك واحد بيقلك بق…بشار عم يتبرا من الشي يلي عم يصير تمهيدا لمدري شو…….بق خلص ادرك نهايتو..بق بق.. …و خصوصا بعد ما اتعبى الاعلام العربي التحليلات الاستراتيجيية لاأبعاد و تحاليل علمية لهالكلام…. …شي بيقلك فأنو اذا طلع قال هيك معناها عم يبرأ حالو او يبعد حالو عن الجيش و الامن استباقا لمحاكمة دولية…..على اساس بمحكمة الجنايات الدولية…او بأي محكمة… بيبنو قرارهون على اساس شهادة الدكتاتور.. او المجرم بهيك حالات….فكان من الضروري انو يطلع و يقول هيك….و بلشت بعدين التحليلات السورية تطغى عالساحة… و انو شفتو شلون عم ببيعكون…و رح يلزقها فيكون…. و الجيش الحر طلع كلام حماسي عم يبشر جنود الاسد انو رح يكونو كبش الفداء….التحليلات ضربت سماء الدنيا لدرجة انو بيطلعلك مؤتمرين صحفيين من وزارة الخارجية ليبقبقبو عن بقبقة الرئيس بقبقة اضافية…انو خافو العالم تفهمهون غلط…..و كل العادة…طلعت مؤامرة…و محطة الاي بي سي اجتزأت الكلام…و ما حطو شغلات…و حرفو و الذي منو…

هلأ انا لا اخفيكم تلبكت شوي اول ما سمعت المقدسي عم يحكي عن التقطيع و الفبركة و هالقصص و انو المقابلة ما انحطت كاملة…..انو صفنت قلت لكن هالمقابلة يلي قريتها كاملة (مع المقاطع يلي قالو على اساس ما نشروهون) من يومين على موقع الاي بي سي شو كانت؟ ترددت.. معقول ما حدا شايفها غيري؟ يعني بالاخيراذا الحكومة السورية عم يقولو ما نشروها كاملة..بدي صدق حالي و كذب الحكومة؟ عيب يعني! و اذا… طلع الخلاف على انو الاي بي سي الله يهديها ما حطت المقاطع متل ما بدهون…يعني وقت حطو 3 دقايق البرومو من المقابلة قبل بث المقابلة بيوم…كان بدهون انو بهل التلت دقايق يختارو تبريرات الرئيس و تعاريفو…مو الكلام الاساسي…انو ايمتن بتشوف تريلر لفيلم و بيحطولك الشغلات المملة فيها مثلا؟ فنفس الفكرة هون…..ما بهم انو المحطة نشرت المقابلة حرفيا من يومين…هنن ما شافوها..معناها في مؤامرة…و ضاجت الدنية…و بعدين مؤتمر صحفي…و زاحت الغمامة…و غرقت القنينة بس ما عرفنا سر البقبق…

فشو قصة سر البقبق؟

ابدا…. تضويع وقت…..كل ما هنالك في سوء فهم بخصوص جمهورين مختلفين تماما… الجمهور السوري و الجمهور الاميركي….الشعب السوري منقسم ما بين مؤيد و معارض..شي بيتفرج عالدنيا و شي بيتفرج عالجزيرة…نسبة الثقافة بهل الجمهور بأدنى المستويات..و دليلي انو محطات متل الدنيا الها صد مسموع جوات البلد على الرغم من ثبوت كذبها علنا مرارا و تكرارا على الرغم من وجودهون عالارض..بس مع هيك الها سميعة بين الشعب…

الجمهور التاني هو الاميركي..مافي حدا من الاميركان بيتابع الدنيا…و مصادرهون الاعلامية ما بتكون تصريحات شريف شحادة وغيرها…و لسوء حظ بشار انو خلال التسع تشهر يلي مرو…ما ضلت شبكة اخبار عالمية الا و بعتت صحفيين لسوريا بالسر و صورو و عملو تقارير ميدانية مصورة…محطات صاحبة موثوقية عالية جدا متل الاي ار تي اي عملت تحقيق ميداني بسوريا…بي بي سي…سي ان ان..سي بي اس..نيوز..سكاي نيوز…بي بي اس…كلهون بعتو صحافيين بالسر و تقاريرهون اكثر مصداقية من تقارير الحكومة السورية يلي وقت بدها تعرض ادلة للاعلام العالمي تدعم روايتها..عرضت فيديو لبناني و ادعت انو حدث في سوريا…فيعني الاعلام السوري و الرأي الحكومي السوري مالو اي قيمة عند حدا….عدا قطيع المنحكبجية..

المقابلة عملتها الاي بي سي موجهة للرأي العام الاميركي…يعني هنن مو جايبين بشار ليحكي شو صاير بسوريا…هنن جايبينو بدهون يسمعو شو بدو يقول بخصوص يلي صاير…..المذيعة مالها بصدد مناقشة بشار بس سماع اجوبتو بشو صاير….اساسا عنوان المقابلة كان “دكتاتور يتحدث”ما كان والله عنوانها “ماذا يحدث في سوريا”…..

يلي صار انو نحنا شفنا المقابلة الموجهة للجمهور الاميركي و صرنا نقيسها على حالنا و ندافع او نهاجم بربارا حسب توجهاتنا….بس الاهم…انو حتى بشار صار اختلاط عليه بين الجمهورين…صار يخاطب الجمهور الاميركي….متل ما بيخاطب الجمهور السوري…… يعني انت مثلا بتكون اميركي و عم تتفرج و بتسمع رئيس دكتاتور عم يقول انو انتو بأميركا الجيش بيقمع المتظاهرين متل سوريا…بيهز راسو و بيقول يفدح راسو شو جاهل…بينما لما بيجي واحد سوري منحبكجي بيسمع هالكلام…بيقلك والله افحمها لبربارا..عطاها مثال من عندهون..انو بيكون مثال غلط و مالو اي تقارب مع شو صاير او الواقع….و الجمهور الاميركي رح يعرف هيك…بس السوري بيهز دبنو و بيقلك ضربة معلم…

بشار حاول يتذاكى…بس اختلط عليه الجمهور… بالاخير بدنا نعرف انو بشار تربى على انو افهم واحد من يلي حواليه…ما فينا ننظر على انو هو دارس بدون ما نشوف البيئة يلي كبر فيها…اهلو و عمومو و خوالو و الرجال و النسوان يلي كبر حواليهون…مجتمع ريفي غير متعلم…هي خلفيتو للزلمة ..كبر و صار دكتور..فيعني لا شعوريا بدك تحس انك افهم واحد من يلي حواليك يلي ما معهون سرتفيكا…و انت معك بكالوريوس..و بعدين سلطة….قليلة اديش رح تحس حالك رب الفهم بيناتهون… متل يلي بيكون قاري كتاب جديد و ما حدا غيرو بيعرف يقرا و بيضل بيحكي عن هالكتاب و يقتبس منو…هالشي بين بكلام بشار من وقت ما استلم و غير خطاب ابوه يلي كان كلو شعارات…و بلش خطاب جديد..هلأ لسور الحظ الكتاب يلي قاريه بشار و فرحان فيه هو القاموس..لانو يلي بيرجع بيسمع كل خطاباتو..دائما بيبلشلك بتعريف و بفتلك بتعاريف و حيثيات…..دعونا نعرف الارهاب…و دعونا نعرف الوطن..و دعونا نعرف التعريف… بفوت بسيرة و بطلع بسيرة و بالاخير بتلاقي حالك انو الشي الوحيد يلي استفدت من خطابو هو انك تعلمتلك كم تعريف…هلأ الكلام شكلو تشليف….بس اذا بتصفنو فيها و بتقارنوها بخطابات ابوه بتشوفو انو النتيجة نفسها و السياسة نفسها…يلي بيختلف هو مستوى العلام بين الاب و الابن…و شعبنا متعود على كلام الاب الخشبي…و معودين على رئيس جاية من قفا البقر…فجأة اجا رئيس متعلم و بيحكي بشكل عقلاني…و العقلانية  بالنسبة النا هون مصدرها التعاريف.. مو من خلال صحة استعمال هالتعاريف…..بس فرق بين الاب و الابن…فبشار معود على هالجمهور يلي عقلو قد الجوزة..و شفنا مجلس الشعب و هالعالم يلي بتركع و بتبوس على دعسة صراميه..فكل هالقصص وقعتو بفخ انو حكا مع الجمهور الاميركي..كأنو عم يحكي مع الجمهور السوري…..

انو بشار ما تبرأ و لا حاول يتبرأ من الجيش و الامن…بالعكس تماما كان متمسك بالدفاع عنهون لابعد شكل ممكن لدرجة انو لما سئلت انوالجيش قتل..قال ما منعرف كلشي…..بس ولا مرة رضي يقول انو الجيش اخطأ بأي شي..حتى لما حكى عالاخطاء ما حدد و حاول يقصي الجيش قد ما فيه و الامثلة الوحيدة يلي ذكرها كانت عن حوادث قتل قامت فيها الشرطة..او المدنيين…قال حدثت اخطاء و تعاقبو بعض المسؤولين…….كلام بربارا لما سئلتوعن قواتو واضح شو المقصود فيها..قواتو الو كرئيس و قائد جيش…ما بدها يفتح القاموس و يشرحلها انو عنا دولة و قانون و جيش و الجيش دورو هيك…هي عم تسألو بعد ما العالم كلو شاف فيديوهات فيها الجيش عم يقتل و يعذب..فقصدها عن هدول مين عطاهون الاوامر او مين المسؤول عن حوادث القتل يلي عم يقوم فيها الجيش حسب الصور و التقارير……هو صار بدو يلف و يدور و يتفصحن…بس جوابو اساسا قائم على انكار انو الجيش او الامن عم يقتل اي حدا و عم يقوم بواجبو حسب الدستور.. لعب عالكلام……حتى لما قالتلو انو شفت صور صحافيين اجو على سوريا و جابوها معهون…بقلها انو شلون فيكي تتأكدي من الصور..فكلشي كلامو كان قائم على شغلة وحدة…انو كلشي اخبار معبية العالم كذب… ..عالسي ان ان وقت حطو هالمقطع من المقابلة..كانو حاطين صورة جنود سوريين عم يقتلو متظاهر بالشارع…هيك عينك كنت عينك…بشار بيقلهون انو هادا كلشي كذب و دعونا نعرف المصداقية و الموضوعية…هو جوابو كان انسب لجمهور منحكبجي…مو لجمهور اميركي…

هراها للمخلوقة تعاريف…تقلو انت تعتبر ديكتاتور بيقلها بدنا نميز بين الدكتاتور و الدكتاتورية و بيسردلو كم تعريف…كأنو المشكلة بسوريا هي مشكلة لغوية…

كلامو عن الامم المتحدة…فات بمليون قصة و بعدين طجها انو الامم المتحدة ماعندها مصداقية….و انبعص النظام قال ليش ما حطو التعليل يلي قدمو بشار عن سبب انعدام مصداقية الامم المتحدة…انو كشفو المؤامرة….بتجي المخلوقة بتقلو انو تقرير الامم المتحدة قال انو في قتلى و تعذيب..قابلو مئات من السوريين يلي عانو من جيشك و امنك…بينط بيقلها انو الامم المتحدة مالها مصداقية…بتقلو ليش يا زلمة طول بالك…هون ما بصدق…و منرجع للقضية الفلسطينينة…و انو الامم المتحدة ما التزمت بتطبيق بقراراتها يلي بمصلحة العرب و ضد اسرائيل و بيعيد السنفونية…و هو فرحان انو برر و قلب عليها الطاولة….بس انو القرارات يلي عم يقول انو الامم المتحدة ما التزمت فيها هي قرارات بتكون مبنية على تحقيقات و تقارير الامم المتحدة…فليش وقتها ما اعترضت على مصداقية تقارير الامم المتحدة يلي بتساويها لجان مستقلة…و هلأ صرت عم تعترض؟ من طول عمرنا منعتمد على ارقام الامم المتحدة و تقاريرها…هلأ صارت مالها مصداقية؟ و شو دخل تسييس القرارات بالتحقيقات المستقلة؟  لا تصدقو الامم المتحدة…لا تصدقو الفيديوهات…لا تصدقو السوريين يلي قابلتوهون…ما تصدقو حدا غير بشار و اعلامو!…..

ثم في نقطة انا لفتتلي نظري ..لما قالتلو انو بالبداية المتظاهرين كانو طالعين و حاملين عروق الزيتون و بدهون حرية و هي هي سبب الازمة يلي عندكون …جواب بشار كان انو اي..منشان هيك بلشنا الاصلاحات مباشرة بعد بداية الاحداث..ماساومنا..الشعب بدو اصلاحات اكتر..عطيناه اصلاحات اكتر…هلأ طبعا هالكلام موجه للاعلام الاميركي مو للسوري…بس الفكرة انو بشار بأول السنة وخلال مقابلتو  مع الوول ستريت جورنال بعد مصر و تونس…قال انو “اذا ما عرفو انو في حاجة لاصلاحات بمصر و تونس قبل بدء  الاحتجاجات ساعتها الوقت متأخر لاي اصلاحات”……و انو “الاصلاحات اذا كانت ردة فعل فرح تفشل”…طبعا عم يحكي وقتها وحاطط رجليه بمي باردة و مالو متوقع انو الشعب السوري ما رح يضل عم ينذل للابد….فشو منشان التناقض بكلامك مسيو بشار؟ اذا عم تقول انو الاصلاحات يلي بتبلش بعد الاحتجاجات او كرد عالاحتجاجات بتكون متأخرة و رح تفشل…بتغيب و بتقتل اربع تالاف واحد مننا و بتغير حكيك و بتقول انو بلشت بالاصلاح مباشرة بعد ما بلشت الاحتجاجات؟ م  انت قلت انها رح تفشل…اتز توو ليت يعني… على حسب تعبيرك..

ركزنا عالمؤامرة تبع الاي بي سي و تقطيع المقابلة..و ما ركزنا على الكذب يلي قالو الرئيس بهل المقابلة…ركزنا عالمؤامرة و نسينا انو اساس كلام الرئيس قائم على انو كلشي تقارير كذب…و انو الاعلام ما بيقدر يتحقق من هالاخبار…علما انو هو يلي مانع الاعلام من الفوتة عالبلد……بعضمة لسانو قال لبربارا انو فيكي تروحي وين ما بدك بحرية..اجا الفريق تبعها بدو يروح و الامن ما خلاه يتحرك بحرية……كلام الرئيس للغرب قائم على انو عندو تأييد شعبي…بالوقت يلي دباباتو و كلابو معبيين البلد منشان ما يصير تجمعات كبيرة تظهر للعالم انو سقط…انت عم تأييد رئيس كل كلامو كذب..كل كلامو قائم على شغلات مالها موجودة غير بعقلك و بعقلو…..عم تأييد رئيس بيطلب منك تكذب كلشي فيديوهات يلي عم نشوفها بسوريا..و تصدق الفيديو تبع لبنان يلي عرضلك ياه…..رئيسك مستحمرك..و انا ما بلومو..حلال عليه بصراحة…الضرب عليك انت….

رجلي ببلد احسن مافيها يحكمها هو هالجحش يلي اسمو بشار الاسد…رجلي بهيك بلد بدها تصير بلد من ورا هيك قيادة…رجلي بشعب بدو يضل ماشي ورا هيك رئيس… و يقلك كرامة و عزة…

و بق بق بق…

————————–

حشيش سوري

9-12-11